Xəbər verdiyimiz kimi, “Gələcəyin qurulması: Avropada birlik və sabitlik” şüarı ilə Avropa Siyasi Birliyi-nin VIII zirvə görüşü Yerevanda başlayıb.
Gununsesi.info xəbər verir ki, İlham Əliyev sammitə videoformatda qoşulub.
Prezident çıxışında bildirib ki, sammitdə iştirakı Antonio Koşta ilə müzakirə olunub və onun videoformatda qatılması razılaşdırılıb. Dövlət başçısı qeyd edib ki, daha əvvəl Ursula fon der Leyen və Koşta ilə görüşdə 2026-cı il sammitinin Ermənistanda keçirilməsi təşəbbüsünü dəstəkləyib.
Eyni zamanda, balansın qorunması üçün növbəti sammitlərdən birinin Azərbaycanda keçirilməsini təklif edib. Bu təklif qəbul olunub və 2028-ci ildə zirvə görüşünün Azərbaycanda təşkil ediləcəyi açıqlanıb.
Nikol Paşinyan isə çıxışında Azərbaycan Prezidentinin ilk dəfə Ermənistanda keçirilən tədbirə (onlayn formatda) qatıldığını vurğulayıb.
O bildirib ki, son iki ildə tərəflər arasında atəşkəs sabit qalır və bu dövr müstəqillik tarixində ən sakit mərhələlərdən biridir.
Siyasi şərhçi Turan Rzayevin saytımıza açıqlamasında dediyi sözlərə görə, Prezidentin sammitə qoşulması sülh prosesi və qarşılıqlı etimad baxımından müsbət addımdır.
Onun fikrincə, tərəflər arasında danışıqlar davam edir və ilkin iqtisadi təmaslar artıq müşahidə olunur.
Ekspert qeyd edir ki, kənar müdaxilələr olmadığı halda Azərbaycan və Ermənistanın ortaq məxrəcə gəlməsi mümkündür. Bununla belə, Avropa Parlamentinin 30 aprel tarixli qətnaməsi sülh prosesinə mənfi təsir göstərə biləcək addım kimi qiymətləndirilir.
Rzayev əlavə edib ki, 2028-ci ildə sammitin Azərbaycanda keçirilməsi regionda normallaşma prosesinin davamı kimi qiymətləndirilə bilər.
Onun sözlərinə görə, həmin vaxta qədər sülh sazişi imzalanarsa, Paşinyanın Bakıya səfəri də real görünür.
Orxan
