“Qızıl ehtiyatlarının bahalaşması Neft Fondunun sərvətinin artmasına gətirib çıxarır.”
Bu fikri Gununsesi.info-ya açıqlamasında iqtisadçı Xalid Kərimli vurğulayıb.
O, qeyd edib ki, son illər fondun qızıl ehtiyatlarını artırmasına xüsusi diqqət göstərməsi və qiymətlərin yüksəlməsi ölkənin milli sərvətlərinin genişlənməsinə olumlu təsir edir:
“Digər müsbət məqam isə Azərbaycanın qızıl hasilatı və qızıl ixrac edən şirkətlərinin maliyyə vəziyyətinin yaxşılaşmasıdır. Qızıl ixracının artması bu şirkətlərin maliyyə imkanlarını genişləndirir.
Lakin qızılın bahalaşmasının mənfi təsirləri də var. Xüsusilə zərgərlik bazarında alıcıların imkanları məhdudlaşır. İnsanların gəlirlərinin illik 7 faizlik artımı fonunda qızılın 58 faizdən çox bahalaşması qızıl alma qabiliyyətini xeyli zəiflədir”.
Xalid Kərimli onu da əlavə edib ki, toy ənənələrinin güclü olduğu ölkəmizdə qızılın bahalaşması ailələri çətin vəziyyətə salır:
“Bu səbəbdən qızıl alıcılarının azalması zərgərlik mağazalarının fəaliyyətinə də mənfi təsir göstərir. Son illərdə qızılın kəskin bahalaşması və sadəcə son bir ildə 58 faizlik artım insanların gəlirlərini üstələdiyinə görə, zərgərlik mağazaları əvvəlki satış həcmini saxlaya bilmir və bu, onların işini çətinləşdirir”.
Gülxanım Əliyeva
