İstanbul Böyükşəhər Bələdiyyəsinin vəzifəsindən uzaqlaşdırılan və həbsdə olan Əkrəm İmamoğlu barəsində aparılan korrupsiya istintaqı başa çatıb.
Gununsesi.info xəbər verir ki, istintaqın yekununda 2025-ci il 11 noyabr tarixində 3 809 səhifəlik ittiham aktı hazırlanıb.
İttihamnamədə “cinayət təşkilatının lideri” kimi göstərilən İmamoğlu “cinayət törətmək məqsədilə təşkilat yaratmaq”, “rüşvətxorluq”, “çirkli pulların yuyulması”, “dövlət qurumlarına qarşı dələduzluq”, “şəxsi məlumatların qanunsuz əldə edilməsi və yayılması”, “cinayət sübutlarının gizlədilməsi”, “rabitəyə mane olma”, “dövlət əmlakına ziyan vurma”, “rüşvət alma”, “ictimaiyyətə bilərəkdən yalan məlumat yayma”, “hədə-qorxu ilə tələb etmə”, “tender saxtakarlığı”, “ətraf mühitin qəsdən çirkləndirilməsi”, “Vergi Prosessual Qanunu”, “Meşə Qanunu” və “Mədən Qanunu”nun pozulması da daxil olmaqla, ümumilikdə 142 epizod üzrə ittiham olunur.
Prokurorluğun ittihamına əsasən, İmamoğlu barəsində 828 il 2 aydan 2 352 ilədək azadlıqdan məhrumetmə cəzası tələb olunur.
Bu arada, həbsdə olmayan bəzi təqsirləndirilən şəxslərin və onların vəkillərinin iştirak etdiyi məhkəmə iclasında CHP-nin bir qrup millət vəkili, eləcə də həbsdə olan təqsirləndirilən şəxslərin yaxınları müşahidəçi qismində iştirak ediblər.
Məhkəmədə çıxış edən Əkrəm İmamoğlu bildirib ki, 9 mart tarixindən etibarən müəyyən fasilələr yaşansa da, proses qarşılıqlı anlaşma şəraitində davam edib. O, həbsdə olan digər təqsirləndirilən şəxslərin müdafiə hüququnun da nəzərə alınmalı olduğunu vurğulayaraq, məhkəmənin 9 iyul tarixinədək yekunlaşdırılmasının mümkün görünmədiyini deyib.
İmamoğlu iclasa sədrlik edən hakim Selçuk Aylandan 9 iyul tarixli məhkəmə iclasının yekunlaşdırılması ilə bağlı qərarın səbəblərini soruşub.
Hakim Selçuk Aylan isə dindirmə qaydasının dəyişdirilməyəcəyini bildirərək deyib: “Bu məsələni heyətlə müzakirə etmişik. Əvvəlcə Tuncay Yılmazın müdafiəsini dinləyəcəyik, daha sonra cənab Əkrəm İmamoğlunun ifadəsi alınacaq. İyulun 9-da planlaşdırılan iclas yekunlaşacaq. Zərurət yaranarsa, həbsdə olan təqsirləndirilən şəxslərlə bağlı ayrıca iclas təyin edilə bilər.”
Buna cavab olaraq İmamoğlu müdafiəsinin sonuncu mərhələyə salınmasına etiraz edib. O, “Əgər 9 iyul üçün xüsusi bir qərar və ya ölkə miqyasında fövqəladə vəziyyət nəzərdə tutulursa, bunu bizə də bildirin. Nəyə görə bizi bu vəziyyətdə saxlayırsınız, bunu başa düşmürəm”, – deyə bildirib.
Hakim Aylan isə İmamoğluna cavabında məhkəmənin əvvəlcədən açıqlanmış iclas cədvəlinə uyğun hərəkət etdiyini vurğulayaraq, “Cənab Əkrəm, xahiş edirəm mövzunu başqa istiqamətə yönəltməyin. Əvvəldən elan etdiyimiz siyahıya tam uyğun şəkildə davam edirik”, – deyə qeyd edib.
Maqsud
