Polşada Katovitse ilə Zabje arasında hərəkət edən 23 nömrəli sərnişin avtobusunun sürücüsü reys zamanı sükan arxasında pivə içdiyi üçün saxlanılıb.
Məlumata görə, sürücünün pivə içdiyini başqa bir avtobus sürücüsü görüb və polisə məlumat verib. Avtobus saxlanıldıqdan sonra sürücüdə alkoqol yoxlaması aparılıb və onun qanında 2,75 promil spirt olduğu müəyyən edilib.
Məhkəmə 63 yaşlı sürücünü 6 ay müddətinə azadlıqdan məhrum edib, həmçinin ona böyük məbləğdə pul cəzası tətbiq edib.
Hekayənin başqa bir tərəfi isə sürücünün Azərbaycan vətəndaşı olmasıdır. 63 yaşlı azərbaycanlı iş dalınca Polşaya gedib və orada avtobus sürücüsü kimi çalışıb.
Gununsesi.info xəbər verir ki, iqtisadçı Natiq Cəfərli də bu fakta nəzər salaraq, hadisənin düşündürücü tərəfinə diqqət çəkib.
Onun fikrincə, sürücünün sükan arxasında spirtli içki qəbul etməsi qəbuledilməzdir və cəzasını almalıdır. Lakin 63 yaşlı azərbaycanlının, təqaüd yaşına cəmi iki il qalmış, işləmək üçün xaricə gedərək avtobus sürməsi insanı düşündürür.
Cəfərli yazır ki, həmin şəxs Polşaya biznes qurmaq, restoran və ya otel açmaq üçün getsəydi, bu hekayənin üzərində dayanmazdı. Ancaq 63 yaşlı insanın ailəsindən, ölkəsindən uzaqda, dolanışıq üçün avtobus sürməsi ona görə kədərli mənzərədir.
Hadisə bir tərəfdən sərnişin təhlükəsizliyinə görə yol hərəkəti qaydalarının nə qədər ciddi olduğunu göstərir, digər tərəfdən isə xaricdə işləməyə məcbur qalan yaşlı azərbaycanlıların taleyi barədə suallar yaradır.
Elmar
