“Dövlət İmtahan Mərkəzi ilə yaxından və ya uzaqdan heç bir əlaqəm yoxdur. Hətta rektor işlədiyim vaxtlarda aramızda bir məsələ ilə bağlı fikir ayrılığı da olub”.
Gununsesi.info xəbər verir ki, bunu millət vəkili Ceyhun Məmmədov deyib. O bildirib ki, son zamanlar Dövlət İmtahan Mərkəzinin hədəfə alınmasını, ləğvi ilə bağlı fikirlərin səsləndirilməsini yanlış və bir sıra hallarda məqsədli hesab edir:
“Hər bir qurumun fəaliyyətindən, qəbul etdiyi qərarlardan kimlərsə narazı ola bilərlər. Ancaq bu o demək deyil ki, qurum və ya sistem ləğv edilməlidir.
Hesab edirəm ki, bu gün ölkədə fəaliyyətini ən peşəkar səviyyədə təşkil edən qurumlardan biri də Dövlət İmtahan Mərkəzidir. Əgər kimsə düşünürsə ki, bu qurumun və sistemin ləğvi ilə təhsilimiz daha ağ günə çıxacaq, yanılır. Onsuz da, bu gün uzun illərdir yaranmış ənənələrin mərhələli və məqsədli şəkildə pozulduğunu bir sıra hallarda müşahidə edirik.
İmtahanların çətin olması fikrinə gəldikdə isə bunun hansısa məqamda və mərhələdə çətin olması fikri nəzərdən keçirilə bilər. Bu gün, hesab edirəm, onsuz da, ali məktəblərə qəbulu kifayət qədər asanlaşdırmışıq. Biz hamının ali təhsilə kütləvi gəlməsi barədə deyil, oxumağa həvəsi və potensialı olan insanların gəlməsi barədə düşünməliyik.
Valideynlərə və bizim dəyərli övladlarımıza gəldikdə isə bilməlisiniz ki, bu gün şəffaf şəkildə imtahan prosesində iştirak etdiyiniz halda gələcəkdə fərqli vəziyyət və hallarla üz-üzə qala bilərik.
Dövlət İmtahan Mərkəzinin ləğvini, müsabiqədənkənar qəbulu dəstəkləyən insanların niyyətləri onların heç də bu fikirdə saf və təmiz olması demək deyil. Burada çirkin məqsəd və niyyətlər də var. Bəzilərinin buna biznes gözü ilə baxması da istisna deyil. Ona görə hissə qapılaraq total hücuma keçib kimlərinsə dəyirmanına su tökməyək.
Eyni zamanda, hesab edirəm, Dövlət İmtahan Mərkəzi də narazılıqları görməzlikdən gəlməməli və qulaqardına vurmamalıdır. Əgər hansısa məsələdə obyektiv narazılıq varsa, bu, ciddi təhlil edilməli, nəticələr ictimaiyyətə açıqlanmalıdır. Gəlin təhsilimizi qoruyaq, onun təəssübünü çəkək”.
Gununsesi.info
